>
ब्रिटिस कोलम्बिया। क्यानडाको ब्रिटिस कोलम्बियास्थित हास्य कलाकार कपिल शर्माको क्याफेमा बुधबार राति गोली प्रहार गरिएको छ। गत जुलाई ७ मा उद्घाटन गरिएको ‘क्याप्स क्याफे’मा आक्रमणकारीहरूले ९ राउन्ड गोली चलाएका थिए। राष्ट्रिय अनुसन्धान एजेन्सीको मोस्ट वान्टेड सूचीमा रहेका खालिस्तानी आतंकवादी हरजीत सिंह लाडीले आक्रमणको जिम्मेवारी लिएको दाबी गरेको छ।
सामाजिक सञ्जालमा आक्रमणको भिडियो भाइरल भएको छ, जसमा क्याफेको बाहिर बसेको व्यक्तिले कारबाट निरन्तर गोली चलाउँदै गरेको देखिन्छ। अहिलेसम्म कुनै घाइतेको खबर भने आएको छैन। प्रहरीले घटनास्थलमा पुगेर अनुसन्धान गरिरहेको छ।
आक्रमण कमेडी शोका क्रममा निहंग सिख समुदायविरुद्ध गरिएको टिप्पणीको विवादसँग जोडिएको छ। सामाजिक सञ्जालमा हरजीत सिंह लाडी र अर्का व्यक्तिले कपिल शर्मालाई माफी माग्न चेतावनी दिएका छन् भने माफी नमागे कारवाही हुने बताइएको छ।
यसअघि पनि निहंग सिख नेताहरूले कपिल शर्माको केही सामग्रीमा आपत्ति जनाइसकेका छन्। घटना अझै अनुसन्धानाधीन छ।
