>
काठमाडौं । भूमि आयोग कास्कीको अध्यक्ष नियुक्ति प्रक्रियामा घुस डिल भएको भन्ने आरोपमा मुछिएका भूमि व्यवस्था, सहकारी तथा गरिबी निवारण मन्त्री बलराम अधिकारीले आफू निर्दोष रहेको दाबी गरेका छन्।
सुनसरी, कास्कीलगायत जिल्लामा भूमि आयोगका पदाधिकारी नियुक्तिमा आर्थिक लेनदेनको कुरा सार्वजनिक भएपछिको विवाद चुलिँदै जाँदा सोमबार प्रतिनिधिसभामा सांसदहरूले सोधेका प्रश्नको उत्तर दिँदै मन्त्री अधिकारीले भने, “कसैले कुरा गर्यो भन्दैमा मलाई मुछ्नु अन्याय हो। मैले कुनै संलग्नता जनाएको छैन।”
उनले यो विषयमा प्रमाण आधारित अनुसन्धान हुनुपर्नेमा जोड दिँदै हल्लाको भरमा आरोप लगाइनु अनुचित भएको टिप्पणी गरे। “तथ्य र प्रमाणको आधारमा सत्य के हो, त्यो उजागर होस्। यदि मैले घुस डिलमा संलग्नता देखिए, म कारबाही भोग्न तयार छु,” मन्त्री अधिकारीले स्पष्ट पारे।
सार्वजनिक पदमा रहेर गरेको नियुक्ति प्रक्रियामा पारदर्शिता र जवाफदेहिताका प्रश्नहरू उठिरहँदा मन्त्रीको यस्तो बचाउ वक्तव्यले संसदभित्र थप बहस चर्किएको छ। अब आयोगका नियुक्ति प्रक्रियाको औपचारिक छानबिन हुने कि भन्ने विषयमा सरकार र विपक्षबीचको दबाब राजनीति तात्दै गएको छ।
