हालै नेपाली कलाकारको विदेश टूर बढ्दै गएसँगै असमान व्यवहार र विवाद पनि बढेका छन्। आयोजकले कलाकारप्रति उचित व्यवहार नगर्ने खबर बढी सुनिन थालेको छ। ‘अब सुन्छ अमेरिका’ टूर यस किसिमको विवादको पछिल्लो उदाहरण बनेको छ।

उक्त टूरमा गायिका कला लम्साल स्वास्थ्य समस्या देखिएपछि बीचमै स्वदेश फर्किन बाध्य भइन्। आयोजकले स्वेच्छाले फर्किएको दाबी गरे पनि लम्सालले आफूलाई मानवोचित व्यवहार नदिएको गुनासो गरेकी छन्। सोही समूहकी गायिका एलिना चौहानले पनि कलाकारलाई ‘नोकरजस्तो’ व्यवहार गरिएको आरोप लगाएकी छन्।

यसपछि अन्य कलाकारले पनि आवाज उठाउन थालेका छन्। गायक पशुपति शर्माले केही कार्यक्रम पहिले सहमति भएपनि समस्या देखिएपछि स्थगित गरेको बताएका छन्। उनले कलाकारहरूलाई विदेशमा कार्यक्रम गर्दा सचेत र सतर्क रहन सुझाव दिएका छन्।

शर्माका अभिव्यक्तिलाई अन्य कलाकारले समर्थन गर्दै, कलाकारको सम्मान, सुरक्षामा ध्यान दिनुपर्ने चेतावनी दिएका छन्।