मनाङमा भारी हिमपातपछि फसेका १५ सयभन्दा बढी नागरिकलाई नेपाली सेनाले उद्धार गरेको छ। तिलिचो, खाङ्गसार, पिसाङ, अप्पर मनाङ र हुम्दे क्षेत्रमा फसेका मध्ये करिब २ सय विदेशी पर्यटकसमेत उद्धार गरिएको सैनिक मुख्यालयले जनाएको छ।
मनाङस्थित नेपाली सेनाको नयाँ भैरवी दल गुल्मबाट खटिएको उद्धार टोलीले प्रहरी, सशस्त्र प्रहरी र स्थानीयवासीको सहकार्यमा सबैलाई सुरक्षित स्थानमा पुर्याएको हो।
ती क्षेत्रहरूमा लगातारको हिमपातका कारण सडक तथा पदमार्ग अवरुद्ध भएपछि सयौं नागरिक र पर्यटक हिउँमा अलपत्र परेका थिए।
सेनाले उद्धार गरिएका सबैलाई अस्थायी आश्रयस्थलमा सुरक्षित राखिएको र आवश्यक स्वास्थ्य सहयोग पनि प्रदान गरिएको जनाएको छ।
मनाङ क्षेत्रमा हिमपात रोकिए पनि चिसो बढ्दै गएकाले थप सतर्कता अपनाउन स्थानीय प्रशासनले आग्रह गरेको छ।
>
