९ कात्तिक, काठमाडौं । तिहार पछि नेपाली बजारमा सुनको भाउ प्रतितोला ११ हजार ६ सय रुपैयाँले घटेको छ। नेपाल सुनचाँदी व्यवसायी महासंघले आइतबार सुनको भाउ प्रतितोला २ लाख ४१ हजार ९ सय रुपैयाँ कायम गरेको छ। तिहारअघि कात्तिक ३ गते सुनको भाउ प्रतितोला २ लाख ५३ हजार ५ सय रुपैयाँ थियो।

अन्तर्राष्ट्रिय बजारमा कात्तिक ४ गते नै सुनको मूल्य करिब ५ प्रतिशत घटेको थियो। असोज ३ गते प्रतिऔंस ४३५८ अमेरिकी डलरसम्म पुगेको सुन अहिले ४१११ डलरमा कारोबार भइरहेको छ। एक औंस सुन बराबर २.४३ तोला हुन्छ। नेपालमा सार्वजनिक विदाका कारण मूल्य समायोजन केही ढिला भयो र यसको प्रभाव आइतबार देखिएको हो। असोज ३१ गते सुनको भाउ हालसम्मकै उच्च प्रतितोला २ लाख ५८ हजार रुपैयाँमा पुगेको थियो।

त्यस्तै चाँदीको भाउ प्रतितोला २६५ रुपैयाँले घटेर ३ हजार १५ रुपैयाँ कायम भएको छ। तिहारअघि चाँदी प्रतितोला ३ हजार २८० रुपैयाँमा कारोबार भएको थियो भने असोज ३१ गते यसको भाउ ३३५० रुपैयाँसम्म पुगेको थियो।