५ असोज, काठमाडौं । आश्विन कृष्ण प्रतिपदादेखि सुरु भएको पितृपक्ष आज अपराह्नकालमा समापन हुँदैछ। यस अवसरमा दिवङ्गत पितृका नाममा तर्पण, सिदादान र पिण्डदान गरी श्रद्धा व्यक्त गरिन्छ। पितृपक्षका १५ तिथिका दिन र आश्विन शुक्ल प्रतिपदासहित सोह्र तिथिसम्म विविध श्राद्ध गर्ने परम्परा रहेकाले यसलाई सोह्रश्राद्ध पनि भनिन्छ।

पितृपक्षको अन्तिम दिन आज आमावास्या अर्थात् औँसी तिथिमा श्राद्ध गरिन्छ। शास्त्रीय मत अनुसार, यदि यस बेला पनि श्राद्ध नगरेको भए, आश्विन शुक्ल प्रतिपदादेखि आश्विन शुक्ल पञ्चमीसम्म गर्न सकिन्छ। त्यहाँ पनि गर्न नसके, कार्तिककृष्ण औँसी वा वृश्चिक सङ्क्रान्ति अर्थात् मंसिरसम्म जुराएर गर्न सकिन्छ। साथै, आश्विन शुक्ल पञ्चमीपछिका अष्टमी, द्वादशी र औँसी, भरणी नक्षत्र र व्यतीपात योग परेका दिन पनि सोह्रश्राद्ध गर्न सकिने धार्मिक विकल्प छ।

यदि शास्त्रीय कर्म गर्न नसके, वैदिक मन्त्रसहित दैनिक १०८ जप गर्ने विधि पनि मानिन्छ, जसले १० महिनासम्म गरिए पितृले तृप्ति प्राप्त गर्ने विश्वास छ। यसरी सोह्रश्राद्धले पितृप्रतिको दायित्व पूरा गर्ने, पितृऋणबाट मुक्त हुने र आगामी माङ्गलिक कार्य गर्न पूर्वतयारी गर्ने धार्मिक महत्व राख्दछ।

यस अवसरमा गोकर्णेश्वर उत्तरगया, नुवाकोट, रसुवा, देवघाट, त्रिवेणीलगायत तीर्थस्थलमा श्रद्धालुहरूको घुइँचो लाग्ने गर्दछ। पितृपक्षको समाप्तिसँगै दुर्गापक्ष अर्थात् बडादशैं सुरु हुनेछ। असोज ६ गते सोमबार घटस्थापना गरी दुर्गापक्ष सुरु हुने जनाइएको छ।