अभिनेता पल शाह अहिले आफ्नो नयाँ फिल्म ‘मोहर’ को प्रमोशनमा व्यस्त छन्। सकारात्मक समीक्षाले थपिएको बलले, फिल्मले रिलिजको तीन दिनमै घरेलु बक्सअफिसमा एक करोड रुपैयाँको कारोबार पार गरेको छ।

फिल्मको प्रमोशनका क्रममा पल शाह विभिन्न जिल्लामा दौडिरहेका छन्। हलमा पुगेर उनी दर्शकसँग भेटघाट, फोटो खिचाइ र प्रत्यक्ष संवाद गरिरहेका छन्। लामो समयपछि उनको फिल्मले हलमा यति राम्रो व्यापार गरेको हुँदा उनको उत्साह झन् बढेको छ।

तर, प्रमोशनका बीचमा मिडियाले उनलाई विवाह योजनाबारे पनि प्रश्न सोध्न छाडेन। ३५ वर्षका शाहले यसपटक रोचक जवाफ दिए— “मैले अहिलेसम्म व्रतवन्ध पनि गरेको छैन। कामकै कारण फुर्सद पाइएन। अब व्रतवन्ध र विवाह एकैदिन गर्ने सोचमा छु।”

पलको विवाहबारे केही समयअघि चर्चा तातिएको थियो। तर उनले त्यतिबेला नै त्यो समाचारलाई खण्डन गर्दै भनेका थिए— “विवाह गर्नै परे मिडियालाई पनि थाहा हुनेछ।”

‘मोहर’ को सफलतासँगै पल शाह फेरि चर्चाको केन्द्रमा आएका छन्। दर्शकको राम्रो प्रतिक्रिया र बक्सअफिसको नतिजाले यो फिल्म उनको करियरमा नयाँ उचाइ दिने संकेत गरिरहेको छ।