पूर्वपश्चिम राजमार्गअन्तर्गत नारायणघाट–बुटवल सडकको दाउन्ने खण्ड लगातार वर्षाका कारण बिहीबार बिहानदेखि अवरुद्ध भएको छ।
सडक मर्मतका क्रममा एकतर्फी सञ्चालनमा रहेको उक्त खण्डमा पानी परेपछि हिलो र चिप्लो भएर सवारीसाधन चल्न नसकेको जिल्ला प्रहरी कार्यालय नवलपुरका सूचना अधिकारी मधु नेपालले जानकारी दिए।
उनका अनुसार विनयी त्रिवेणी गाउँपालिका–२ स्थित विश्वकर्मा मन्दिर र घ्युखोलाको बीचमा सडक अवरुद्ध भएको छ। “मालवाहक सवारीसाधनहरू उकालो चढ्न नसकेपछि जाम हुन नदिन प्रहरी परिचालन गरिएको छ,” नेपालले भने।
हाल नेपालमा बंगालको खाडी र अरब सागरमा विकसित दुईवटा चक्रवातीय प्रणालीको संयुक्त प्रभाव देखिएको छ। यसका कारण देशका अधिकांश स्थानमा वर्षा भइरहेको मौसम पूर्वानुमान महाशाखाले जनाएको छ।
कोशी र मधेश प्रदेशका केही स्थानमा आज र भोलि भारी वर्षा हुने सम्भावना रहेकाले सतर्कता अपनाउन सम्बन्धित निकायहरूले आग्रह गरेका छन्।
>
