काठमाडौं — ११ करोड रुपैयाँको ठगी आरोप लागेपछि सिप्रबी सेक्युरिटिजका महाप्रबन्धक जयन्त श्रीवास्तव बुधबार काठमाडौं महानगरीय प्रहरी परिसरमा आफैं उपस्थित भएका छन्।
श्रीवास्तवमाथि सेयर कारोबारको रकम भुक्तानी नदिएको आरोप लागेपछि दुई जना पीडितले प्रहरीमा उजुरी दिएका थिए। प्रहरीका अनुसार उजुरीकर्ताहरू मिता मुरारका अग्रवाल र ज्योति अग्रवालले आफूहरूले सेयर कारोबारबाट पाउनुपर्ने ११ करोड ५५ लाख रुपैयाँ फिर्ता नपाएको गुनासो गरेका हुन्।
उक्त उजुरी सन्दर्भमा काठमाडौं प्रहरी परिसरका एक अधिकृतले जानकारी दिँदै भने, “ठगी कसुरसम्बन्धी जाहेरी परेको हो। श्रीवास्तव स्वयं उपस्थित भएर अनुसन्धान प्रक्रियामा सहयोग गरिरहनुभएको छ।”
सेयर कारोबारी दीपेन्द्र अग्रवालले मिता, ज्योति लगायत १५ जना व्यक्तिका नाममा सेयर कारोबार गर्दै आएको पाइएको छ। धितोपत्र बोर्डको प्रारम्भिक अनुसन्धान अनुसार, अग्रवालले ती नामहरू प्रयोग गरी आफैं सेयर किनबेच गर्ने, बजार मूल्य कृत्रिम रूपमा बढाउने, र सामाजिक सञ्जालमार्फत सर्वसाधारणलाई आकर्षित गर्ने जस्ता कार्यमा संलग्न रहेको निष्कर्ष निकालेको छ।
प्रहरी अनुसन्धान अनुसार, श्रीवास्तव नेतृत्वको ब्रोकर कम्पनीले कारोबारमा संलग्न दुई व्यक्तिलाई भुक्तानी दिन अस्वीकार गरेको आरोप लागेकै आधारमा ठगी सम्बन्धी अनुसन्धान सुरु गरिएको हो।
प्रहरीले हाल श्रीवास्तवमाथि प्रारम्भिक बयान लिने कार्य गरिरहेको जनाएको छ। हिरासतमा राखेर थप अनुसन्धान गर्ने वा नगर्ने भन्ने विषयमा जिल्ला अदालत, काठमाडौंको अनुमति अनुसार अगाडि बढ्ने प्रहरीले जनाएको छ।
यो घटनाले सेयर बजारमा पारदर्शिता, नियमन र लगानीकर्ता सुरक्षाप्रति गम्भीर प्रश्न उठाएको छ।
>
