काठमाडौँ । भदौ २३–२४ मा जेनजी आन्दोलनका क्रममा काठमाडौँ उपत्यकामा आगजनी र तोडफोडमा परेका सवारी साधनहरू सङ्कलन सुरु गरिएको छ।
दुईपांग्रे र चार पाङ्ग्रे सवारी साधनहरू टेकुस्थित उपत्यका अपराध अनुसन्धान कार्यालयको कम्पाउन्ड र कपनस्थित प्रहरी प्रभागमा राखिँदैछन्। सवारी साधनको विवरण लिन इच्छुक व्यक्तिहरूले टेकु र कपनमा सम्पर्क गर्न काठमाडौँ महानगरपालिकाले अनुरोध गरेको छ।
प्रहरीका अनुसार काठमाडौँ, भक्तपुर र ललितपुरमा १२१ वटा गाडीमा आगजनी भएको थियो। जसमा ११७ वटा पूर्ण रूपमा जलेका छन् भने ४ वटा गाडीमा आंशिक क्षति पुगेको छ।
दुईपांग्रे सवारी साधनमा १५८ वटा आगजनीका घटना भएका छन्। साथै, साइबर ब्युरोका ४ वटा, सशस्त्र प्रहरीका ३ वटा र राष्ट्रिय अनुसन्धान विभागको १ वटा गाडीमा पनि आगजनी भएको छ। रानीपोखरीमा जलेको एक टोयोटा गाडीको स्वामित्व अहिलेसम्म खुलेको छैन।
>
