काठमाडौं । प्रदर्शन तयारीमा रहेको फिल्म ‘रिमै’ बुधबार भव्य प्रिमियरसहित सार्वजनिक गरिएको छ। न्यूरोडस्थित रञ्जना सिनेप्लेक्समा आयोजित कार्यक्रममा गुरुङ समुदायको सांस्कृतिक झाँकीले माहोल झनै रौनकिलो बनायो।
प्रिमियरमा अभिनेता दयाहाङ राई र अभिनेत्री रिश्मा गुरुङ परम्परागत भेषभूषामा देखिए। उनीहरूसँगै अन्य कलाकार, निर्माता तथा चर्चित सेलिब्रेटीहरूको उपस्थिति उल्लेखनीय रह्यो।
खिलबहादुर गुरुङ निर्देशित यो फिल्म गोरखा सिरानचोक एण्ड लिगलिगकोट फिल्मस् प्रालीको प्रस्तुति र रोटेपिङ इन्टरटेनमेन्टको सहकार्यमा बनेको हो। फिल्ममा दयाहाङ र रिश्मासहित अर्पण थापा, गौमाया गुरुङ, कविता आले मगर, माओत्से गुरुङ, पुस्कर गुरुङ, वीरमाया गुरुङ, वीरवल घले, डिबी गुरुङ, टेक गुरुङ र बालकलाकार असिम सुब्बा, प्रेस्टु गुरुङ र प्रश्ना राना मगरले अभिनय गरेका छन्।
फिल्मको पटकथा उपेन्द्र सुब्बाले लेखेका हुन् भने खिचाइ शैलेन्द्रध्वज कार्कीले गरेका हुन्। वीरवल घले कार्यकारी निर्माता हुन् भने टीका गुरुङ, जितयात्री गुरुङ र दुनबहादुर घले निर्माता रहेका छन्। बिनु गुरुङ, रोशन भट्टराई र राजेश घिमिरे सह-निर्माता हुन्।
गुरुङ समाजको कथालाई केन्द्रमा राखेर निर्माण गरिएको ‘रिमै’ शुक्रबारदेखि देशभरका हलमा प्रदर्शन हुने तयारीमा छ। प्रिमियरमा देखिएको उत्साहका आधारमा यो फिल्मप्रति दर्शकमाझ ठूलो अपेक्षा रहेको देखिन्छ।
>
