अन्नपूर्ण बेसक्याम्प क्षेत्रमा गएरातिदेखि बाक्लो हिमपात भइरहेको छ। अन्नपूर्ण गाउँपालिका–११ अन्तर्गत करिब ४ हजार १३० मिटर उचाइमा रहेको बेसक्याम्पमा आन्तरिक र बाह्य पर्यटकहरू हिउँमा रमाइरहेका छन्। हिमपातसँगै क्षेत्रको तापक्रम तीव्र रूपमा घटेपछि चिसो बढेको र जनजीवन प्रभावित भएको स्थानीयहरूले बताएका छन्।
यद्यपि, हिमपातका कारण खेतीका लागि फाइदा हुने भएकाले स्थानीय किसानहरू खुसी देखिएका छन्। अरब सागरमा विकसित न्यूनचापीय प्रणालीको प्रभावले नेपालका उच्च पहाडी र हिमाली क्षेत्रमा आज र भोलि वर्षा र हिमपात हुने सम्भावना जल तथा मौसम विज्ञान विभागले जनाएको छ। हिमपातका कारण अन्नपूर्ण क्षेत्र अझ आकर्षक देखिएको र यहाँ पुगेका पर्यटकले दृश्यको आनन्द लिइरहेको बताइएको छ।
>
