अमेरिकी राष्ट्रपति डोनाल्ड ट्रम्पले युक्रेनको कुनै पनि भूभाग रूसलाई सुम्पिने प्रकारको सम्झौता नहुने बताएका छन्। अलास्का बैठकअघि युरोपेली नेताहरूसँगको भर्चुअल छलफलमा उनले युद्धविरामको साटोमा भूभागको अदलाबदली स्वीकार नहुने प्रष्ट पारेका हुन्।
सिएनएनका अनुसार, ट्रम्पले भूभागसम्बन्धी निर्णय युक्रेनकै अधिकार हो भन्दै राष्ट्रपति भ्लादिमिर जेलेन्स्कीको सहमति बिना कुनै वार्ता नहुने दोहोर्याए। यसअघि उनले युद्धविरामका लागि जमिनको अदलाबदली हुनसक्ने संकेत दिएका थिए।
फ्रान्सका राष्ट्रपति इमानुएल म्याक्रोंले ट्रम्पका दुई सन्देशको व्याख्या गरे—पहिलो, अलास्कामा हुने वार्ताबाट युद्धविराम सफल गराउने; दोस्रो, भूभागसम्बन्धी निर्णयमा केवल युक्रेनको सहभागिता हुने।
ट्रम्पले युद्धविराम सफल भए जेलेन्स्कीसहितको अर्को वार्ता चाँडै सुरु गर्ने बताउँदै, अमेरिकी भूमिकासहितको सुरक्षा ग्यारेन्टीको समर्थन पनि जनाए। असफलता भए रूसलाई गम्भीर परिणाम भोग्नुपर्ने चेतावनी दिए। साथै, रूससँग तेल किन्ने मुलुकहरूमाथि थप प्रतिबन्ध लगाइने चेतावनी पनि दिए।
युरोपेली कूटनीतिज्ञहरूले यसलाई सकारात्मक संकेतका रूपमा लिएका छन्, किनकि यसले ट्रम्पको अडान युद्धविरामतर्फ मात्र सीमित नभई युक्रेनको भू-स्वाधीनतामा पनि केन्द्रित भएको देखाउँछ।
>
