अमेरिकी राष्ट्रपति डोनाल्ड ट्रम्पले आगामी वर्षका लागि देशको इतिहासमै सबैभन्दा कम शरणार्थी प्रवेश सीमा तोकेका छन्। नयाँ नीतिअनुसार आर्थिक वर्ष २०२६ मा केवल ७,५०० शरणार्थीलाई मात्र प्रवेश अनुमति दिइनेछ।
सेप्टेम्बर ३० मितिको राष्ट्रपतीय दस्तावेजअनुसार, यो निर्णयले विश्वभरका लाखौं विस्थापित र असुरक्षित अवस्थाका मानिसहरूका लागि अमेरिकी ढोका झनै बन्द हुने सङ्केत गरेको छ।
दस्तावेजमा भनिएको छ कि सीमित संख्यामा प्रवेश पाउनेहरूमध्ये अधिकांश दक्षिण अफ्रिकाका गोरा अफ्रिकनहरू हुनेछन्। ट्रम्पले ती समुदायहरूलाई “कालो बहुमतको सरकारद्वारा सताइएका” दाबी गर्दै आएका छन्, तर दक्षिण अफ्रिकी अधिकारीहरूले यो दाबी अस्वीकार गरेका छन्।
यससँगै, अमेरिकी शरणार्थी पुनर्वास कार्यक्रमका जिम्मेवारीहरू स्वास्थ्य तथा मानव सेवा विभाग अन्तर्गतको शरणार्थी पुनर्वास कार्यालयमा सारिने भएका छन्, जसले “स्रोत र जवाफदेहीताको राम्रो समन्वय” गर्ने जनाइएको छ।
यो सीमा सन् १९८० को शरणार्थी ऐन पारित भएपछि तोकिएको सबैभन्दा न्यूनतम हो। बाइडेन प्रशासनका बेला वार्षिक १ लाख २५ हजार शरणार्थी प्रवेश अनुमति थियो।
संयुक्त राष्ट्रसंघीय तथ्यांक अनुसार, अहिले विश्वभर ४ करोड २७ लाख शरणार्थी छन्। ट्रम्पको यो नीति अमेरिकी शरणार्थी इतिहासमा अभूतपूर्व कटौतीको रूपमा हेरिएको छ।
>
